kavitha on telugu language day

                            తెలుగు భాషా దినోత్సవం

ఏదెక్కడ తెలుగు తోట - ఉన్నదంతా గంజాయి తోట 

పట్టుపంచెలుపోయి - పట్టేసే జీన్సులొచ్చాయి. 

లంగవోనీలు పోయి - లేనిపోని దుస్తులొచ్చాయి. 

బుట్ట చెవిలీలు పోయి - చెవులుసాగే చెవిలీలు వచ్చాయి.

సడులు చేసే గాజులు పోయి  - బోడిచేతులయ్యాయి. 

బంగారుబొమ్మ అనే పదంపోయి- మోడ్రన్ అమ్మ అనే బిరుదులొచ్చాయి. 

పప్పు,ఆవకాయ పోయి - పీజా,బర్గర్లొచ్చాయి. 

సంకురాత్రి పండగలు పోయి - పబ్ రాత్రి పండగలొచ్చాయి.

పాయస,పరమాన్నములు పోయి - పనికి మాలిన పైడ్రైస్ లొచ్చాయి. 

ఎంకిపాటలు పోయి - పెంకి పాటలొచ్చాయి.

జనము మెచ్చెడి జానపద గీతాలు పోయి డిజె కొట్టు డిజె అంటు డిజె లొచ్చాయి. 

బూరె,గారెలు పోయి - బేకరీ కేకులొచ్చాయి.

అప్పడ అరిసెలు పోయి - అమ్మకపు సమోసాలొచ్చాయి.  

బుర్ర కథలుపోయి - వెర్రికథలు మొదలయ్యాయి. 

ఉగాది పచ్చళ్ళుపోయి - దాన్ని వండలేని తిప్పలొచ్చాయి. 

అమ్మ నాన్న అనే హృదయ మాటలు పోయి - మమ్మీ డాడీ అనే నోటిమాటలొచ్చాయి.

పదహారణాల తెలుగమ్మాయి అనే మాట పోయి - 

                                                    ఎటువంటి అమ్మాయొస్తుందనే  ఆలోచనలొచ్చాయి.

తీయనైన తెలుగు మాటలుపోయి - అర్ధంకాని ఆంగ్లమాటలొచ్చాయి.

ఏదెక్కడ తెలుగుదనం - ఇంకెక్కడ ఆ నిండుదనం?

నాటి నూతనానికున్న విలువ - నేటి నూతనానికేది? 

ఆ నూతనాన్ని అనుభవించని నీకు నూతనమేది? 

నూతనం వద్దని నేననడం లేదు  కానీ..

తెలుగుదనం కన్నా గొప్ప నూతనం లేదని అంటున్నా.

                                                                                                         ఇట్లు 

                                                                                                     మీ మిత్రుడు

                                                                                                     బి.దుర్గ బాబు.(IIIT Nuzvid)

                                                                                                      7995721404

                                                                                                    

kavitha with music notes

                                 సంగీత పదాలతో కవిత

ఒక తల్లి తన కొడుకు ఇలా ఉండాలని కోరుకుంటుంది

సరిగ సరిగ  అని అందరు సమమని నువ్వు నడవాలని
రిగమ రిగమ అని రివ్వున ఎగురుతు రెక్కవిప్పాలని
గమప గమప మని గజము నీవని ఘీంకరించాలని
మపద మపద అని మంచి పథమున నీవు నడవాలని
పదని పదని అని పగను వదులుకొని ప్రేమ పంచాలని
దనిస దనిస అని దమ్ము ధర్యమని నీవు నమ్మాలని
నిసని నిసని అని నిసిని కొట్టుకొని శశిల రావాలని
సనిస సనిస అని సాధ్యమేమి లేదని నీవు నమ్మాలని
సనిద సనిద మని సద సంకల్పముతో
నిదప నిదప మని నిరాశ చెందని నిగ్రహముతో
దపమ దపమ అని ధర్మము వీడని దారులతో
పమగ పమగ మని పంతమువీడని పరాక్రమముతో
మగరి మగరి అని మనిషి మనీషి అని చాటిచెప్పగల మర్మముతో
గరిస గరిస మని గమ్యమెక్కడని వెతుకులాటతో
రిసరి రిసరి అని రొమ్ము విరుచుకొని రగడతో
తకదిమి తకఝను అని తాళమేసిన గెలుపు తలుపు తెరిచి
తదిగినత అని తానెదిగిన తళుకు మెరుపై మెరిసి
తఝనుత మని ,ఆ ఘనత గని సుచరితను సృష్టించి
కిటకిటమని,తదికిటమని,తళ తళ మని తళాంకుతోమని
కళ కళ మని , భళ భళ మని జయభేరి మ్రోగించి
ప్రతి ఒక్క ఒక్కరికీ ప్రేరణగా నిలవాలని కోరుకుంటుంది.
అలాగే........
నీ గొంతు ప్రతి గొంతుకు కదలికివ్వాలని
సరిగమపదనిస అని ఎదుగుతూ
సానిదపమగరిస అని ఒదుగుతూ
వుండాలని సంగీత తల్లి కోరుకుంటుంది.
 
                                                                                               రచన : బి.దుర్గబాబు 
                                                                                                IIIT NUZVID
                                                                                               7995721404

 
   

ప్రేరణాత్మక కవిత - తెలుగు కవితలు

   అనంతమైన కడలిలో ఒక నీటి బిందువు కూడా పనికి రాదే ?

   అద్భుతమైన ఇంద్రధనస్సు వల్ల ఉపయోగం లేదే ?

   కనిపించే నింగి నిజం కాదే ?

   ప్రాణాన్ని నిలబెట్టే గాలికి ప్రాణం లేదే ?

   జాబిల్లి రావే అన్న మాటలో జాబిల్లి ఎప్పటికీ రాదే ?

   మహా వృక్షంగా ఎదిగే విత్తనం పెద్దది కాదే?

   మహా పర్వతాన్ని తవ్వగల ఎలుక గొప్పది కాదే?

   జీవాన్ని నిలబెట్టే జలంకు రంగు లేదే?

   నీలో ప్రవహించే రక్తానికి జీవం లేదే?

   సానబెట్టని వజ్రానికి విలువ లేదే?

   మరి..........
   జీవితమనే పోరును ఎదుర్కోలేని నీకెక్కడ గొప్పస్థానం లభిస్తుంది?

   పై వాటిని ఒక్కోటిగా మార్చి చూడు?

   అనంతమైన కడలి అనంతమైన జీవరాశికి ఆధారం అవుతుంది

   అద్భుతమైన ఇంధ్రధనస్సు ప్రకృతికి అందాన్నిస్తుంది

   నిజం కాని నింగి తన ఉన్నతస్థాయిని చాటుతుంది

   ప్రాణంలేని గాలి నీ ఊపిరికి కారణం నేనంటుంది

   జాబిల్లి అన్న మాటలో జాబిల్లి రాకపోయినా జాబిల్లిని చేరుకోవాలనే ఆశ మనలో పుట్టించింది

   విత్తనం పెద్దది కాకపోవచ్చు,వృక్షమై ఆశ్రయాన్ని అందిస్తుంది 

   ఎంత పెద్ద పర్వతాలనైనా పిండిగా కొట్టగలనని ఎలుక సందేశాన్నందిస్తుంది

   జీవితాంతం నీ జీవం నిలబడాలంటే జలం అయిన నన్ను సేవించాలంటుంది

   నాలో జీవం లేకపోయినా నేనే జీవం అంటూ రక్తం ప్రకటిస్తుంది

   సానబెట్టి చూడు నేనే విలువైనదాన్ని అని వజ్రం అంటుంది

   ప్రయత్నించి చూడు, ప్రయత్నిస్తూనే ఉండు అని జీవితం అంటుంది.

   వేలంతలేని చీమ వేలెత్తి చూపుతుంది ఓరి పిచ్చోడా! నాకన్నా పెద్ద శ్రమా నీది అని

   భగ భగ మండే అగ్ని అడుగుతోంది నాకన్నా ఎక్కువగా కాలుతున్నావా అని

   కనిపించనివి ఎన్నో తమ ఉనికిని చాటుతూ నేనే గ్రేట్ అంటున్నాయి

   కనిపించేవి ఎన్నో నేనే నిజం అంటున్నాయి

   వాటన్నింటినీ గుప్పిట్లో పెట్టుకోగల నీవు ఐ యాం ద గ్రేట్ అనలేవా?

   చూడు...

   నీలో నువ్వే తొంగి చూడు

   నిన్ను మించినోడు ఇంకెవ్వడు లేడు.

   బలహీనుడవై బ్రతుకును తుంచుకుంటావో ,

   బలవంతుడవై భవిష్యత్ ను బ్రతికించుకుంటావో

   నీ నిర్ణయానికే వదిలేస్తున్నా!

                                

                                                                                         ఇట్లు

                                                                                   మీ మిత్రుడు

                                                                           బి. దుర్గ బాబు.